Fræðslufundur í samvinnu við Verkfræðingafélag Íslands
Þriðjudaginn 13. október kl. 12-13 í vefútsendingu. Þeir sem skrá sig á fundinn fá sendan tengil á hann á fundardegi.
Þeir sem vilja mæta á staðinn geta sent beiðni um það til sigrun@verktaekni.is
Mjög víða í samfélaginu er verið að vinna verkefni, hvort sem það er innan fyrirtækja eða stofnana. Stærðargráða þeirra og flækjustig eru mismunandi en oftar en ekki eru teymi þeim að baki. Í atvinnulífinu hefur verið lögð mikil áhersla á faglega verkefnastjórnun. Gerðar eru verk-, tíma- og kostnaðaráætlanir og besta leiðin fundin. Minni gaumur hefur verið gefinn að mannlega þætti greinarinnar, sem felur meðal annars í sér að byggja upp traust í teymum og skapa öruggt umhverfi fyrir meðlimi þeirra til að segja hug sinn af einlægni og takast á um hugmyndir og aðferðir á uppbyggilegan hátt.
Í fyrirlestri þessum ætla Áslaug Ármannsdóttir og Laufey Guðmundsdóttir að fjalla um hvernig hægt er að byggja upp sálfræðilegt öryggi innan teyma og vinnustaða. Að auki verður snert á því hvaða tækifæri til árangurs liggja í því að veita samskiptahluta verkefna meiri eftirtekt og tíma. Nokkur tæki og tól verða kynnt til leiks til að auðvelda stjórnendum, verkefnisstjórum og öðrum áhugasömum að auka sálfræðilegt öryggi teyma á meðvitaðan máta.
Um fyrirlesara:
Áslaug Ármannsdóttir starfar sem verkefnisstjóri heimsmarkmiða Sameinuðu þjóðanna hjá Háskóla Íslands. Hún er einnig sjálfstætt starfandi verkefnisstjóri, markþjálfi og teymisþjálfi. Áslaug er með MPM-gráðu í verkefnastjórnun og hefur lokið BA gráðu í mannfræði.
Laufey Guðmundsdóttir starfar sem verkefnisstjóri hjá Markaðsstofu Suðurlands. Að auki starfar hún sem sjálfstætt starfandi ráðgjafi, markþjálfi og teymisþjálfi. Laufey er með MPM-gráðu í verkefnastjórnun og hefur lokið BS gráðu í viðskiptafræði.
